鼠王芬尋日被問起工聯會嘅部署，表現得氣定神閒，話會以靜制動，靜觀其變，又指經歷○八年富貴黨田北辰「橫空出世」參選，知道政治波譎雲詭，亦明白選舉靠實力，佢唔會寄望其他人唔選，而係操弗自己去選，就好似參加泳賽一樣，綁住雙眼就跳落水，搏命向前游，唔會理身邊對手係邊個咁話。

至於工聯會由助選變參選，冇咗呢個救生圈有乜影響？可能會沉落水底喎！鼠王芬話距離選舉仲有兩年，言之尚早，亦唔評論如果工聯會向佢招手同一張名單參選呢類假設性問題，總之無論工聯會點樣行軍布陣，或者九龍西加唔加議席，都唔會影響佢競逐連任嘅考慮。

至於係咪參選由一個大選區選出嘅「超級區議會議席」，鼠王芬話暫時冇呢個諗法，但明年區議會選舉就一定喺黃埔東競逐連任，指呢三年區議會生涯過得好開心喎。聽鼠王芬嘅語氣，睇嚟建制派喺九龍西好難四四六六拆得掂。