工聯會會長鄭耀棠前日自爆唔排除會親自披甲出戰「超級區議會議席」，但無論係建制派定係泛民主派，都對棠哥最終會否出戰有好大保留，一來佢已退出議會十幾年（佢喺回歸前做過立法局議員），二來依家貴為行政會議成員，好難想像佢仲會有心機同時間做立法會同區議會工作。
再者，為免太早畀對手睇通條路，各黨派都會留到最後一刻先公布真正嘅選舉部署，棠哥咁高調事先張揚，難免令人懷疑佢係靠嚇居多。
有建制派人士分析，五個超級議席中，建制派估計只能坐二望三，因此有機會參戰嘅四大建制派政團建仔、工聯會、富貴黨同匯賢智庫，必須作出協調同視乎其他三個政團嘅部署嚟決定自己嘅人選。偏偏超級議席嘅參選人必須係現任民選區議員，四個政團當中，富貴黨前主席田北俊同匯賢智庫嘅葉劉淑儀都未必可以喺單議席單票制嘅區會選舉中穩勝，佢哋能否攞到入場券參選超級議席，要等到明年底先至知，令大家唔知點樣部署好。
其次，剔除退意已決嘅陳婉嫻，工聯會內擁有全港知名度嘅就得番棠哥同「阿王」王國興，但如果阿王轉戰超級議席，佢本身嘅新界西直選議席可能輸番。
雖然建仔擁有最多立法會議員同區議員，但屬於雙料議員嘅只得四個，其中張學明仲係委任區議員，唔符合參選資格，其餘三人亦各有不足，改派第二梯隊出戰又風險過高，總之就係諗爆頭，隨時要磨多一年半載形勢先會比較明朗。