以前都講過立法會秘書長Pauline吳文華係工作狂，佢忙起上嚟日日食三文治都得，但佢又好鍾意新鮮感，一有時間就鍾意捐窿捐罅試新餐廳。趁立法會放暑假，有日Pauline去咗中環士丹利街一間叫「Night Market」嘅樓上餐廳試新嘢，一如其名，呢間餐廳主打台灣嘅地道菜式，不過餐廳裝潢就相當摩登，幾有fusion味道。嗰度不設訂位，仲要人齊至有枱㗎！
呢間餐廳午市打正旗號賣台式便當，每份便當都有燥肉飯同三款伴菜。食客再可以自行選擇魯雞腿、香酥豬排同宮保蝦球等九款主菜，加多杯珍珠奶茶就啱啱好嘞。其中佢哋嘅宮保蝦球更係水準之作，蝦球爽口得嚟又有鮮味。雖然餐廳主打夜市食品，但價錢就一啲都唔夜市，之不過喺中環食嘢可以百零蚊埋到單，算係咁啦。