Owen同Alvina相識五年，喺前年嘅九月十六號開始拍拖，Owen舊年九月十六號「跪地」求婚，今年九月十六號結婚，包保唔會忘記呢個日子。新娘Alvina穿上低胸露肩婚紗出場，略帶性感，佢大讚老公靚仔、孝順又細心，至於Owen亦好識做，讚老婆滿分，又發表愛的宣言：「永遠對佢好同愛佢！」黃百鳴就對女婿畀足一百分！

莊士集團執行董事Albert莊家彬拉埋緋聞女友GiGi傅明憲一齊幫手做兄弟姊妹，GiGi前夫、前海域集團主席葉劍波捲入一宗官司，GiGi被問及事件時顯得好緊張：「今日係Alvina生日，呀唔係！係結婚，所以唔好意思講自己嘢，唔想搶新人風頭。」佢嘅緋聞男友Albert就話冇留意葉劍波嘅事。