雖然今個中秋冇連住禮拜六同禮拜日，但趁住秋高氣爽，出門外遊嘅人亦唔少。康泰旅行社董事總經理Jason黃進達升正後度過首個大節日，佢話今年台灣同韓國嘅團生意最好，反而向來係港人至愛嘅日本，行情就一般嘞，事關依家日圓高企，所以少咗人去。唔知同近日發生嘅釣魚島事件又有冇關係呢？
投資外幣要睇眼光，如果一早儲落日圓嘅話，依家就賺到笑啦！Jason話佢公司一直都有儲外幣嘅措施，除咗日圓，其他貨幣佢哋都有唔少存貨。不過，佢話自己就冇入定日圓，依家專心做好呢份工，短期內亦唔會出門。
Jason前日喺一個潮屬社團嘅活動現身，佢本身係潮州人，但佢話喺屋企都係講廣東話，不過自從加入咗社團之後，同世叔伯溝通得多，自己嘅潮州話都進步咗唔少。