貼舊相邊有吸引力

其實，之前為咗推銷「起錨」騷同悼念菲律賓人質慘劇嘅死難者，特首辦已經試過喺facebook開設網頁，吸引唔少市民留言致唁。至於今次個網頁，內容設計同之前兩個網頁如出一轍，都係以圖片為主，網頁管理人將好多煲呔曾出席活動嘅相片貼出嚟，當中有啲已經相當舊。係咪食腦㗎？又攞番啲舊料出嚟，點會有吸引力呀？

呢個網頁名義上由特首辦主任譚志源主理，直至尋日傍晚時分有九百幾人「讚好」，表面上好似反應唔錯，但咪畀呢啲數字呃倒，睇真啲，留言同支持嘅人當中竟然有好多熟口熟面嘅名字，好似譚志源自己、民政事務局副局長許曉暉、財政司司長政治助理葉根銓、民政事務局局長政治助理徐英偉、勞工及福利局局長政治助理莫宜端同埋油尖旺民政事務專員郭黃穎琦等等。至於商務及經濟發展局副局長蘇錦樑，更加喺自己facebook上面轉載呢個網頁嘅資料添。

游手好閒白高薪

嘩！咁多副局政助「自己友」大鑼大鼓咁撐場，明眼人都睇到佢哋擦老闆鞋擦唔切，仲想製造假象谷起個勢，等市民以為呢個網頁好掂啫！咁擺明係做媒啦！

喺咁多「自己友」之中，以徐英偉最為勤力，竟然可以喺每一輯相下面表態讚好，證明政治助理真係冇乜嘢做。呢班副局政助月薪高至二十幾萬元，低嘅亦有十幾萬元，竟然可以游手好閒到係咁歌頌呢個網頁，唔通政府就係想吸納呢啲另類優才？