咦，呢單嘢好似唔係新聞噃，三個月前平機會就發表調查報告，批評領匯轄下多處公共場所嘅無障礙通道未如理想，要求從速改善，依家仲未搞掂咩？

何止未搞掂呀，直情係按兵不動啦！以何文田愛民商場為例，茶樓喺商場二樓，冇電梯，坐輪椅人士如果想歎一盅兩件，就要兜個圈去商場側門，沿住臨時斜道上樓，喺後門入茶樓。咁樣兜兜轉轉，就算係正常人都嫌煩啦，何況係殘疾人士。更危險嘅係，臨時斜道居然冇扶手，叫啲輪椅人士點用呀，一個唔小心就會「車翻人倒」。

平機會嘅調查報告點咗愛民商場個名，要求領匯盡快改善，點知領匯借咗聾耳陳隻耳，當乜事都冇發生過，激到平機會主席林煥光生蝦咁跳，狂鬧領匯「反應零碎」，仲話如果再冇改善，唔排除採取法律行動，向領匯發出執行通知令咁話。

又唔怪得人哋咁慶嘅，三個月流流長，使唔使拖咁耐呀？領匯就詭辯，話佢哋唔係唔想做，而係等到商場裝修先一齊解決喎。不過，有殘疾人士團體踢爆，安裝斜道只係簡單工程，根本唔使等到裝修先至做。所以，等裝修係假，有心拖至真。

其實，就算商場裝修咗，無障礙設施都未必會改善。嗱，同屬領匯嘅樂富商場早排翻新後，輪椅使用者仲要推門先至可以搭到電梯，鬼死咁麻煩。無他嘅，領匯裝修嘅時候，根本唔會考慮點樣方便殘疾人士，又點會使錢改善無障礙設施噃。講到尾，都係錢字作怪。叮！

話時話，領匯實在太縮骨，每年賺十幾億元，仲經常狂加租，撈到盆滿缽滿，要佢攞少少錢出嚟改善對殘疾人士嘅服務就牙痛咁聲。難為班友仲夠膽死吹水唔抹嘴，話要「領先參與公益事，匯聚愛心獻社群」添，真係唔知個醜字點寫。

不過咁，香港法例明文規定，公共場所要設置無障礙設施，為殘疾人士提供方便。所以領匯拒絕改善設施，已經唔係肯唔肯做善事咁簡單，直情係違法行為。仲有，如果啲輪椅人士有乜嘢冬瓜豆腐，睇領匯班高層點死。叮佢個鎯鎯！