三十一歲的黃楚峰（David）是灣仔區議員，○七年加入匯賢智庫，首次參選便一舉成功。當選後他沒有鬆懈，區議會內所有委員會都參加：「做新人係要勤力啲！」他的辦事處在大坑，老街坊或中產居民都和他稔熟，他自豪地說：「大至舊樓強行拍賣，小至天花漏水，佢哋都會搵我。」
做AO一啲意思都冇
David出身典型中產家庭，家住九龍塘又一村，在九龍華仁書院畢業後，到加拿大讀工商管理。○二年大學畢業，他一直對從政有興趣，適逢港府招聘政務官，遂報名考試：「我連畢業禮都冇行，就入咗政府。」
滿腔熱誠的他，一心想在政壇大展拳腳，但事與願違：「我做過民政事務總署同食物及衞生福利局，見到市民有好多問題好想政府幫，但嚟得總署同局嘅問題即係冇得搞，次次都係覆番封一模一樣嘅信：已經收到你嘅信，對你嘅問題深表同情……寫到我都識背，一啲意思都冇！」
最叫人意想不到的是，AO竟連「狗仔隊」都要做：「○三年政府推賭波條例，我哋去到立法會，做『狗仔』盯住一班議員，佢哋去廁所我哋都要去，目的係要箍票。」他苦笑：「點諗到做AO要做到咁！」
○五年David決定辭職，參選兩年後的區議會選舉：「我想真正服務市民，做AO根本冇辦法做到。」父母初時很反對，但他非常堅定，選定大坑為選區，每天晨早起身派傳單，更不惜「紆尊降貴」租住唐樓板間房：「我要了解呢個區，感受居民面對嘅問題。大坑好多舊樓，冇管理、冇設施，但街坊住咗幾十年，好有感情。」
做區議員，最大滿足感是有認受性：「做AO，只需要說服幾個考官去請你，但做區議員，就要說服好多選民選你。選舉好公平，老闆就係選民，有民意授權，做嘢唔同啲。副局、政助日日畀人鬧，就知有冇民意嘅授權，分別幾大！」
黃楚峰小檔案 David's Profile
年齡：31歲
學歷：加拿大約克大學工商管理學士
香港大學公共行政碩士
現職：灣仔區議員
興趣：睇戲