本文重點
樓市急升，香港人又為買唔買樓、資唔資助議論紛紛，好多人都覺得依家嘅情況同十二、三年前有啲相似，諗起「八萬五」，曾經一殼眼淚嘅「驚恐症」又好似隨時來襲咁，廠商會立法會代表林大輝都話，佢雖然唔係八萬五嘅直接受害者，但係間接受害者，事關有朋友「江湖救急」問佢借錢，到依家仲未還清。
大輝尋日同傳媒聚會時，不點名批評某啲「有權有勢嘅人」唔應該亂咁講嘢，尤其係針對民生同房屋政策，擔心「講兩講（樓價）就會跌」。佢又話香港人最驚兩樣嘢，一樣係天災，一樣係人禍，其中天災就係沙士，「八萬五」就係後者。佢仲話，當年有幾個朋友畀銀行追數，曾經問佢借過錢，事隔十幾年，到依家仲未還晒。
唔好盡信「某君」
講講吓，大輝仲連夾萬密碼都攞嚟講，話佢家吓去外地旅行，酒店房間嘅夾萬密碼都係用「8500」，以警惕自己「八萬五」嘅禍害。講到近日仇富仇商問題畀人炒到熱烘烘，佢認為市民只係不滿部分地產商嘅處事手法，唔係真係憎晒整個商界同所有有錢人，叫大家唔好盡信「某君」，明顯又係語有所指。