香港大學尋日頒發名譽院士銜，天文台前台長「黑英」林超英獲母校頒授榮銜，咁威水嘅時刻，黑英竟然冇置新衣，反而隆重其事戴番條「古董」呔，即係六十年代嘅港大校呔返母校被「扑頭」，別具意義之餘又夠晒環保。
六十年代嘅香港大學，名副其實嘅精英學府，有呢條呔可以話係傳統精英嘅身份象徵。但黑英謙稱今次獲母校頒授名譽院士係早嚟嘅禮物，有啲意外，覺得母校好睇得佢起，事關佢諗住要到老啲先有得攞喎。
不過，攞多個榮譽同佢嘅環保生活無牴觸，「黑英」覺得物質唔代表快樂，佢即使去觀鳥，佢都唔會用超貴望遠鏡，亦唔會影相，貫徹環保到底。
退休後，黑英曾經自嘲患上「退休後過度活躍期」，經常「送外賣」四出演講，最近又去中大教書講授大學通識，喺地理學系開講氣候、能量、生命嘅課題，順便宣揚減消費同靈性生活。早前佢都獲頒「特許氣象學家」榮銜，證明佢喺氣候方面絕非小角色喇。