近排好多人都講仇富，有學者分析指本港貧富懸殊愈來愈厲害，搞到低下階層同被剝削嘅人士對富有階層態度轉變。全國人大常委范徐麗泰尋日被問到呢個問題時，冷靜咁話：「仇富同厭貧，都係唔應該嘅。」
范太仲話，有錢人應該發財立品，賺到錢要回饋社會。至於貧窮問題，社會上乜嘢崗位嘅人都應該盡力拉近貧富懸殊嘅問題。
富與貧係任何一個社會都存在嘅問題，但本港近期出現嘅一啲針對富有或權貴階層嘅言論，卻顯示社會內部爭拗已經加劇，范太將富與貧擺埋一齊，可以引導人哋諗得深啲，更重要嘅，亦係寄語人人都應該幫手解決扶貧問題，唔好推畀某一界別。政府下個月就會發表施政報告，點樣撫平貧富裂痕相信係焦點中嘅焦點。