亞視風雲不斷，昌興國際主席黃炳均早前向現有三名亞視股東購入五成二股權，成為亞視大股東。有份出售股權嘅亞視董事、全國政協常委陳永棋尋日出席一個十．一酒會時，講到亞視問題，佢好乾脆咁話，過幾日收到錢後，就會將手頭股份全部畀晒黃炳均，成單商業合約大家傾掂咗，佢亦正式無晒股份，仲會辭退董事職位添，即係話，到時佢會全面退出亞視。
棋哥雖然已有計劃全身而退，但都希望新舊股東能夠和氣生財。講番呢次隱退，棋哥話，三年前已經將手頭亞視股權賣咗畀全國政協委員查懋聲及荷蘭銀行，當時已無理亞視業務，但係仍然掛住董事個名，所以過幾日收埋錢，就會全面退出。
至於啲股份售價好唔好，佢唔肯透露，話最重要係做好件事。佢又希望將來新舊股東可以和氣生財，大家攞多啲錢出嚟搞好個亞視，等以前做過亞視大家庭嘅一分子，都覺得好高興。