不明飛行物體（UFO）近期熱爆香港，好多「證據」事後都證實係街燈或者光影，生物化學專家曹宏威日前出席一個酒會時，講到呢件事都係一副唔信邪嘅樣：「多餘！」佢仲牙擦擦咁話：「唔係我唔信，係冇得畀我信！」
曹博士話，上世紀九三年有美國機構搵佢以專家身份，同廿幾名科學家一齊去英國睇UFO，結果得啖笑；佢又試過喺古堡守夜睇鬼，結果點？佢話：「梗係冇啦！」轉頭我哋又見到極地探險家李樂詩，佢對有冇UFO持保留態度，話自己未親眼見過，但知好多人信。佢試過喺極地見過變幻莫測嘅極光，有啲係螺旋形，唔通又話係UFO咩？
兒科專家醫生李家仁就話，以前信基督教時就話上帝創造世界，但係冇人知上帝創造咗幾個世界喎，有多幾個世界都唔出奇㗎！依家佢改信佛教，就會話：「有又好，冇又好，使乜咁執着？」