公務員事務局局長俞宗怡率領十五名常任秘書長去北京同上海「遊學」，尋日獲國務委員劉延東喺人民大會堂接見，劉延東語重心長咁同佢哋講，希望公務員深刻理解「一國兩制」方針及《基本法》，進一步了解國情民情，增強國家觀念及全局意識，提高施政及管治水平。
獲劉延東接見，可以話係呢班常秘今次上國情研習班最重要嘅一課。俞宗怡見過劉延東之後話，研修課有啟發性，希望今後有更多機會到內地訪問，了解國家最新發展；佢又引述劉延東，讚揚港府處理菲律賓人質事件反應迅速。
俞宗怡又話，公務員事務局過去二十年為員工提供唔少認識國家嘅研習課程，今次有十五個常秘一齊去係唯一一次，比較難得；佢強調兩地官員互訪係過去二十年來不斷舉辦嘅活動，唔擔心影響公務員中立性。