醫管局行政總裁蘇利民下月便會離任，該局正緊密遴選繼承人，尋日已開始面試揀蟀。醫管局質素及安全總監梁栢賢係大熱人選之一，原來佢尋日已經接受面試，據聞，佢為今次面試做足準備，希望盡力做到最好，似乎志在必得。
上月底發生「8．23慘案」後，梁栢賢全力幫手搞醫療及傷者支援等，上星期又陪咗寶貝女兒飛去英國開學，返香港無幾耐，就要準備面試。公私兩忙一輪，家吓終於可放下心頭大石，可以休息吓喇。
今次行政總裁一職，據聞係四人之爭，除咗梁栢賢同聯網服務總監張偉麟有主場之利外，獵頭公司亦分別喺英國同澳洲搵咗兩位猛人過江挑戰。
雖然外界都視人緣好、公共衞生經驗足嘅PY為大熱之選，加上又盛傳醫管局今次想搵本地薑，同聲同氣管理醫管局五萬幾名員工，不過一日未公布人選，一日都未知花落誰家，大家不妨拭目以待。