抖咗兩個幾月嘅立法會快將復會，十幾個事務委員會同小組主席人選誰屬又成焦點，立法會建制同泛民兩派其實早就協調過委員會正副主席人選，不過，資訊科技及廣播事務委員會同財務委員會嘅主席人選卻有暗湧，事關五散人嘅IT豪譚偉豪有意挑戰冧莊資訊小組，建築、測量及規劃嘅劉秀成都話會考慮係咪競逐財委主席，無論點，佢哋都要闖議會協調機制嘅關卡，淨係熱定身係唔夠嘅。
建制派對IT豪表明「冇票畀」
IT豪係舊年資訊科技小組嘅主席，新一年卻被協調做副主席，佢早前揚言，業界有聲音想佢競逐小組主席，為業界把關。
IT豪仲話，當年建制同泛民兩派協調十幾個事務委員會同小組負責人時，仲沒有五散人呢個組織。
下個月十四號，立法會各事務委員會就會開始選正副主席，IT豪嘅打算分分鐘攪亂建制同泛民喺其他十幾個委員會嘅部署，所以建制派曾經游說佢唔好出戰，仲講到明為免破壞機制、搞到其他十幾個委員會因為咁牽一髮而動全身，坦言「冇票畀」，即係IT豪參加競選都會輸。
劉秀成挑戰卿姐：考慮吓
另一個有暗湧嘅係立法會財務委員會主席，呢個位一向係議會政黨兵家必爭之地，白鴿黨副主席劉慧卿年年都吼實呢個位，今年佢公開呼籲其他人嚟爭。做過財委會副主席嘅劉秀成有經驗又穩重，日前佢去立法會開會時，CALL機竟然猛響，事後佢透露係有記者CALL佢，了解佢今年會唔會挑戰卿姐？佢點答呢？劉秀成半講笑半認真咁話：「既然咁多人問到，我都要考慮吓至得！睇吓有冇人支持喇。」佢跟住又強調家吓冇任何決定，似乎仲未落定棋。