咪住先，乜食環署仲有聲譽嘅咩？係人都知道，食環署近年醜聞多多，滅鼠無方令香港變成老鼠天堂，蚊患指數又弄虛作假，講起環境衞生更係令人反胃，轄下公眾墳場又撈亂屍骨，仲有工作人員返工蛇王，練功睇戲大覺瞓。食環署個朵早就臭晒。家陣署方煞有介事捍衞根本唔存在嘅聲譽，係咪好搞笑呢？

言歸正傳，食環署人員欺壓跪地婆婆嘅事大家一定記憶猶新。呢位年過七十歲嘅小販喺街上擺檔時，十幾個食環署人員殺到，要檢控同埋沒收貨物。婆婆跪地苦苦求情，食環署人員一於冇面畀，堅持檢控到底。睇唔過眼嘅仗義伯伯出手阻止，竟然都無端端惹上官非。後來輿論狂炳食環署冇人性，署方先至死死氣撤銷兩人嘅檢控。

本來呢，人非聖人，孰能無錯？做錯事認咗咪得囉，可惜食環署署長卓永興等高層不嬲卸膊成性，佢哋話喎，署方早就有指引，對老弱傷殘嘅小販要酌情處理，而前線人員拘控婆婆嘅時候，冇按照指引辦事。咁即係話，成件事都係前線人員搞出嚟嘅，唔關署方嘅事。死得佢吖，輕輕側吓膊就將成隻鑊卸甩晒，問你服未？

前線人員又點肯食死貓噃，有工會代表直言，署方此舉等同卸責前線員工。佢哋踢爆，署方嘅指引只發畀中層人員，前線人員未必了解，又話指引對老弱傷殘定義不清，等於夾硬要前線人員充當法官。

話時話，佢哋講得又幾有道理嘅，署方唔界定點樣先算係老弱傷殘，叫前線人員點運用酌情權呀？正如工會代表話齋，有啲小販睇起嚟好老，其實只有五十幾歲，咁告唔告？

署方被踢爆，老羞成怒，礙於當時群情洶湧，仲未敢發作。但係過咗唔夠一個月，佢哋就開始反擊嘞。署方信件措詞嚴厲不特止，副本仲發畀其餘十二個工會，咁做好唔尋常，等同警告信，直情係要炒人咁款。

呢一招擺明係秋後算帳，雖然署方實牙實齒話唔係打壓工會，但係有立法會議員質疑，署方如果不滿員工嘅言論，點解唔直接同佢哋溝通，反而單方面發信呢？反映卓永興只識掩飾，唔係認真面對問題。

真係一針見血，好明顯，署方根本唔係要解決問題，而只係想卸鑊，對外卸唔到，就對內卸，搵自己人嘅笨。唉，咁搞法，食環署又點會唔臭名遠播。叮！