教育局政治助理Jeremy楊哲安同佢嘅藝人太太張燊悅喺上禮拜六添多一女！成為兩女之父嘅Jeremy尋日出席活動時難掩喜悅之情。
教育局局長孫明揚尋日開記者會講暫緩殺校措施，作為政助嘅Jeremy當然要到場傍住孫公啦。Jeremy早前以陪太太生仔為由而冇跟其他副局政助去上海考察，大家尋日見到佢當然八吓佢太太生咗未啦，佢會後甜絲絲咁話細女已經喺上禮拜六出世，有成七磅幾重，相當健康。Jeremy仲畀BB女嘅相畀記者睇添！睇見BB女白淨又靚女，似足佢嘅明星媽咪喎。
天生一副外父相嘅Jeremy直言未幫細女改名，又大呻呢排忙於搞暫緩殺校單嘢，唔夠時間陪太太同BB女，希望自己日內可以快啲搞掂啲手尾，請番一兩日假陪陪太太同屋企嘅新成員。