立法會財務委員會下個月改選主席，連續做咗兩年主席嘅白鴿黨立法會議員劉慧卿，本來想心存謙虛，但又忍唔住話「無敵是最寂寞」，事關今次可能又喺冇對手下勝出。選舉未到最後一刻都未知鹿死誰手，萬一滑鐵盧點算？
其實新一屆立法會開波時，卿姐以兩票之差，險勝有「IQ博士」之稱嘅立法會中總代表黃宜弘，舊年就更加喺冇對手嘅情況下冧莊。難怪話到嘴邊想吞番落肚嘅卿姐，最終都忍唔住慨嘆「無敵是最寂寞」啦，仲話鼓勵現任財會副主席劉秀成同佢鍊過！
不過，卿姐都深知選舉嘅嘢絕對唔能夠輕敵，所以尋日佢同傳媒講上個月已經向全部議員發信拉票，然後又不忘向記者打探有冇其他對手。成功連任嘅機會大唔大呢？卿姐話估唔到，事關佢都唔知班議員會點樣投票，再者點樣投票都唔喺佢控制範圍。