本文重點
本報前日披露立法會飲食界議員「肥仔張」張宇人考慮緊卸任富貴黨副主席。據聞，佢因為企硬飲食界立場，同黨主席Miriam劉健儀及常委田北辰等一眾黨領導層意見早已時有相左，甚至激烈爭拗，雖然同擠在一個黨領導層牌匾下，但係貌合神離，再加上首個最低工資水平建議就快出台，立場肯定分歧大，所以突然傳出佢有意卸任副主席，黨內人覺得有啲突然，但就唔感到愕然。
Miriam尋日喺一個飯局中亦話肥仔張毋須辭職，仲話佢對最低工資嘅壓力都唔係今時今日至有㗎啦！
檢討領導層架構
雖然Miriam講到肥仔張打算離開領導層嘅消息係子虛烏有，但佢唔知道原來肥仔張喺佢呢個飯局前一粒鐘已接受咗香港電台訪問，仲直認的確考慮過辭任副主席，最重要黨內係咪有更理想人選出任，目前未有決定。正、副主席唔夾口供，反映佢哋溝通真係出問題喎。
富貴黨拿拿臨幫佢哋補底，出新聞稿話該黨正檢討黨內領導層架構，研究點樣加強黨務工作，其中一個考慮方向係檢討黨章規定只可有兩名副主席嘅安排，係咪切合黨務發展，但目前一切尚在探索階段，冇任何定案，會喺黨內展開諮詢後先會有決定。講到模棱兩可，無論套落Miriam定肥仔張嘅說話都可以成立，幫兩位正、副主席搵定下台階。