呢屆立法會可謂多事之秋，班議員嘅口舌之爭由議會內蔓延到議會外，難怪旅遊界議員阿Paul謝偉俊上個禮拜去華山旅行，亦掛住佢班「好同事」。「華山論劍」家喻戶曉，但阿Paul去到居然忽發奇想，想邀請一眾同僚去華山「論政」，仲直言復會後會積極研究點樣組團一齊去喎。
阿Paul上個禮拜同幾位旅遊業界朋友到西安辦公事，難得去到當地，當然要把握機會上華山見識見識啦。佢話攀華山並非易事，事關靠吊索上到半山後，仲要徒步行四至五粒鐘先可以到山峰，相信老婆白姐姐唔啱去，佢亦行咗粒半鐘就鳴金收兵嘞。
首次去華山嘅阿Paul，形容華山好有靈氣同歷史背景，但上到山峰嘅時候，佢唔係想同人論劍，而係論政：「希望大家去到嗰度都可以收口，乜嘢唔掂都拆掂佢啦！」唔好以為阿Paul只係講吓，佢一臉認真咁話，復會後會積極組團約班同事共赴華山，仲話之前大家已經有坐高鐵到上海嘅「出團經驗」，有信心搞得成喎！
雖然論政係靠把口嘅，之不過好多議員平日喺議事廳都舌劍唇槍，手中冇劍但心中有劍，睇怕上到華山都好難拆得掂。