本文重點
喺暑假期間，康泰旅行社太子爺黃進達（Jason）為咗工作，先後去過新加坡同俄羅斯，但今個月初坐正做康泰董事總經理後，就要留守香港大本營，冇得再四圍飛。佢覺得咁樣對另一半都係好事，因為佢以往成日唔喺香港，女友只能遷就佢抽時間外遊拍拖，以後佢可以抽多啲時間陪女友嘞。睇怕Jason升職，最高興嘅應該係佢女友。
提起緋聞耍手擰頭
康泰贊助港姐拍攝外景二十四年，今年Jason陪港姐到印度拍外景，仲同冠軍陳庭欣傳出緋聞。提起緋聞，佢即刻耍手擰頭話：「梗係唔係啦！」仲話以後未必有時間親自帶隊拍外景，相信女友聽到一定放心。提起女友，Jason小心翼翼，只輕輕透露女友唔係旅遊界中人。不過，佢爸爸康泰老闆黃士心就曾經爆料話未來新抱係城大前校花，依家喺會計師樓工作，同乖仔感情相當穩定，只係等擇日拉埋天窗。
除咗有另一半支持，Jason仲繼承咗爸爸嘅多計性格，未來會繼續搞噱頭搵名人帶團，嚟緊會搵蘇施黃帶團去韓國，遊山玩水之餘，相信阿蘇會煮番幾味好餸招待團友。