14/09/2010

播放本新聞相關短片

政情:肥根考察日本龕位有得着

立法會漁農界議員「肥根」黃容根啱啱去完日本考察,前日返港後隨即又忙於處理番香港事務,忙到連佢喺日本買番嚟嘅長腳凍蟹都冇時間食。咪以為肥根淨係掛住食呀,佢喺日本考察骨灰龕位都有收穫o架,仲話幾值得香港借鏡添!

喺今個月初,立法會衞生事務委員會同食物安全及環境衞生事務委員會前後腳去日本考察,前者睇醫療融資,後者就睇骨灰龕位。肥根兩個都有去,換言之去咗日本差不多成個禮拜。前日喺札幌返港嘅佢話,臨走時佢喺機場使咗七千日圓,即係約六百幾蚊港紙買咗隻長腳凍蟹,但到依家仲擺喺雪櫃度未開嚟食,事關佢太太啱啱出埠,諗住等埋老婆先一齊食喎!

講番去日本考察,佢話日本都有靠近民居嘅骨灰龕位,但係就容許附近居民優先買位,雖然平嘅都要成幾萬蚊港紙一個,但就可以減低居民反感,呢條橋真係值得香港借鏡。