梁展文調查快收工

今屆立法會開波冇耐就出動《立法會（權力及特權）條例》呢把尚方寶劍，調查梁展文事件同迷債事件，因為社會上對兩宗事件都有好大反響，所以大批直選議員都蜂擁加入相關嘅委員會。

之不過，如今調查梁展文事件嘅專責委員會收工日期指日可待，反觀雷曼小組喺呢兩年嚟，只係完成向政府高官、監管機構同埋幾間銀行高層嘅聆訊，遲啲仲要傳召銀行前線職員同迷債苦主。

本來雷曼小組打算召賣迷債賣得多，或者收到投訴最多嘅銀行職員上嚟問話，但有委員透露銀行方面有意見，覺得有啲職員已經辭工，搵番佢哋有難度喎；跟住又有委員爆料話，依家小組仲未諗到請邊啲苦主畀口供，覺得最好苦主們自己推介一個上嚟，換言之又係傾過先掂。

難怪心水清嘅委員話，分分鐘成千頁紙嘅雷曼小組報告起碼花半年時間先寫完，但依家聆訊都未完，加上小組主席何鍾泰亦同佢提過可能搞到今屆會期尾，所以最終得益者好可能係班直選議員。不過，有委員就覺得錯有錯着，事關呢兩年嚟，大新、豐明同星展三間銀行先後推出過回購協議，反映立法會調查帶畀銀行壓力。即係話，對委員嚟講，呢啲都可以當係「政績」嚟㗎。

挾政治籌碼谷選情

無論點都好，小組份報告點都會搵人開刀㗎喇，份報告愈係近二○一二年換屆選舉期，小組委員會內班直選出身嘅委員，包括葉劉淑儀、李慧琼、梁美芬、陳鑑林、甘乃威、涂謹申同埋好大機會由勞工界功能組別轉戰新界東直選嘅葉偉明等等，都可以乘機抽份報告水，將報告嘅內容大講特講，當係政治籌碼咁力銷同標榜自己成功徹查迷債事件，幫自己喺選舉中造勢。

迷債苦主人數逾萬，連埋佢哋嘅親朋戚友，若化成選票，係咪好和味先？