類似個案多不勝數，鋃鐺入獄不過係小兒科，連命都輸埋嘅仲有大把。呢，前排廣州有個彩民輸到精神失常，持槍同警方對峙幾個鐘之後被擊斃；日前中山又有毒彩癮君子沉迷賭海不可自拔，斬死老婆之後自殺。

叮！毒彩仲恐怖過瘟疫，害到同胞家破人亡。更恐怖嘅係，地下六合彩以前集中喺鄰近香港嘅廣東沿海地區，因為有人照，家陣已全方位擴散，除西藏之外，各個省市已相繼淪陷，全國遍地開花。

唔止大中城市，連農村都因為彩禍，富村變窮鄉，愈窮愈爛賭。湖北石首近排破獲多個地下賭檔，繳獲一批非法六合彩報。當地有條富村，好多人受非法六合彩報荼毒沉迷賭博，短短三個月成條村加埋輸咗五十萬，唔少村民為避賭債焗住走佬。

有被捕莊家承認，每個禮拜都會免費派發大批六合彩報；亦有負責案件嘅警員踢爆，不法集團已設立可下載貼士資訊嘅專門網頁。連地下賭博都玩「升呢」，問你服未？

太一叮諗極都唔明，內地成日講和諧社會，網上雜音都要收聲，地下六合彩禍國殃民，點解有毒資訊冇畀當局「河蟹」呢？仲有，不法集團利用債仔開拓「客源」，內地打擊層壓式傳銷不遺餘力，唯獨對以金字塔式架構吸血嘅地下六合彩網開一面，咁又點解釋？

有內地學者話，地下六合彩喺鄉下特別猖獗，農村治安由派出所維持，冚賭可罰款，只拉賭徒唔捉莊家，常罰常有，財源不斷，甚至懷疑有執法人員參與其中，有軍方背景撐腰。

叮！官賊夾份搵食，即係官「偏」勾結啫！話時話，撈偏好好搵㗎，呢，河南有個莊家經營地下六合彩一年，投注額近四億，自己入袋竟然高達六千萬。

內地公安部門估計，全國地下六合彩投注總額每年一千到二千億元。講真，咁大暴利，貪官有乜理由唔流晒口水呀？如果冇中央層級官員包庇，點會全國遍地開花？不法集團點可能咁狼死呀？

地下六合彩為禍內地，多得走私北上嘅港產六合彩報推波助瀾。其中《創富》、《六合皇》同《貼士皇》，就係由壹淫媒老闆淫賤黎擔任董事嘅公司承印。走私彩報去到邊，地下六合彩就旺到邊，邊度就烏煙瘴氣，點解內地當局一直坐視不理？

計太一叮話齋，當年毛澤東要「全國山河一片紅」，家陣地下六合彩遍地開花冇人管，正一全國山河一片「六」，再唔揪出彩禍幕後靠山，請問紅色政權仲撐得幾耐？