阿勇打扮踏實，身穿Polo Shirt、牛仔褲，說話陰聲細氣，很難想像他與都市英雄扯上關係，不過英雄背後總有段古。家有三個妹妹的阿勇自小養成「大佬格」，愛好管閒事，替人排難解紛，漸漸更「唔幫唔安樂」：「其他小朋友扭計買玩具，我就纏住阿媽買旗！」中四加入義工團後更立志做社工，順理成章入大學選讀社工系，讓他由社工化身區議員的念頭，正是由第一年大學課萌芽。

○一年政府清拆大磡村寮屋，夷平逾百戶家園，對剛升讀大學的阿勇有很大衝擊，「嗰陣去大磡村考察，見到村民好地地住咗幾十年，政府就收地迫遷，仲話連上樓資格都冇……政府話以人為本，但我見到好多基層受折磨！」惻隱牽動俠義心腸，更令阿勇警醒到做社工僅幫人事後搶救，參與社區工作才可防患未然。

大學畢業後加入民協任社區幹事，四年後選深水埗區議員高票當選，工作包括要求政府加建交通燈、天橋升降機，而處理最多則是婆媳糾紛。但是，這些工作，真能根治社會制度問題嗎？「改變社會係好漫長，我知要忍耐。」

入立會？不如直接幫人

這邊廂說忍耐，那邊廂卻按捺不住「幫人癮」，每周總會抽一、兩個通宵，放下區議員身份，化身「無名俠客」，「空降」觀塘游走夜青間，他的秘密武器正是先天特強的同理心，他說：「自細好多人話我明佢哋諗乜，啲夜青都會講煩惱我知，其實佢哋無聊先會搞事。我哋叫佢唔好打架就唔會打，雖然只係畀面我哋，仲未知錯，但起碼佢唔會咁易犯事，咁已經好有意義！」

不過阿勇肯做都市英雄，也非人人鍾意。生於草根家庭的他，父親是油麻地果欄運輸工人，母親則是家庭主婦，兩老捱足廿年，湊大四兄妹，自然望子成龍，「佢想我考警察拎鐵飯碗，唔使做社工咁複雜，又唔使做區議員畀人鬧，所以會吟吟沉沉『哦』我。」多番耐心解釋後終獲父母體諒，「我話份工係幫人，佢哋唔會反對嘅。」

連家人一關也過了，可有想過殺入立法會？「仲諗緊，但點都好，我都係享受前線直接幫人多啲！」落手落腳助人，是英雄最大樂趣。

黃志勇小檔案

年齡：30歲

學歷：2003年理工大學社會工作學士畢業、2007年中文大學應用社會科學碩士畢業

現職：區議員、深宵外展社工

興趣：行山、壁球、桌上遊戲

婚姻狀況：「快㗎啦」