貿易發展局前總裁Michael施祖祥，早幾日喺上市公司長江製衣同埋YGM貿易公司嘅股東會上現身，原來係兩間同系公司嘅創辦人陳瑞球力邀佢做獨立非執行董事，兩人仲有東莞同鄉嘅淵源添！
球伯話邀請Michael入董事局好多年㗎喇，但Michael一直冇應承，直至今年三月先至成功引佢入局。Michael就話自己退咗休咁耐，應該冇利益衝突喇啩，又話一九八四年佢喺貿易署任職時已同球伯相識，佢哋仲係東莞同鄉添！球伯忍唔住笑Michael：「佢係東莞人，但竟然四十幾年都冇返過去！」Michael聽罷都笑稱，後來係球伯帶佢返鄉下嘅！
退休高官做上市公司獨立非執董、顧問唔算罕見，正如金管局前總裁任志剛密食當三番，但Michael好謹慎，今次係佢第二份職務，第一份係另一間上市公司太古嘅獨立非常務董事。