每年都有團體為立法會議員考勤,選出啲「懶惰豬」,勢估唔到平日唔算懶嘅白鴿黨議員涂謹申,竟然亦有惰性。
做全職立法會議員真係唔容易,唔係要睇文件,就係要開長命會,一日坐成十粒鐘,絕對有需要定期做運動舒展筋骨。好似尋日咁,無家者世界盃香港代表隊同深水埗警隊踢咗場友誼波,阿涂晨咁早就去撐場,但因要返教會,所以冇落場踢番兩腳。
阿涂話見到大家踢波都有啲心癮起,仲笑言自己唔係好夠氣,踢十幾分鐘就會氣喘,一定要不斷換人先得。咦!似乎同佢平時喺議事廳嘅長氣袋形象有啲出入噃!
佢又自爆平時好少運動,係早前有個前輩八十歲先學打網球,會定期book場同約埋教練餵波,佢先至落場戥腳,但只限每月一次。