葉偉明係勞工界代表，對職安健嘅問題理應駕輕就熟，比賽開始後冇幾耐佢嗰組一直領先，點知去到中段佢竟然連錯幾題，搞到畀人扣分，最終對手仲後來居上添！佢嗰組最後包尾收場，而梁美芬竟然爆冷勝出，葉偉明呢次真係老貓燒鬚嘞！

葉偉明事後笑笑口話輸贏真係好閒，最緊要多啲人留意呢方面知識。佢以前經常處理工友受傷或者死亡嘅索償個案，但近年就真係少掂咗，加上比賽問嘅問題太專門，所以佢都識唔晒。

雖然贏咗場比賽，但梁美芬亦好謙虛咁話職安健知識其實對佢從事法律工作好有用，因為喺處理工業傷亡案件時可以較易判斷誰是誰非，加上職安健問題其實連做文職都需要留意，所以佢都好支持咁話。