依家好多政界人士都善用互聯網呢個溝通平台，而自拍後將短片放上YouTube公諸同好，亦唔係後生仔專利。今年六十六歲嘅前港區全國人大代表「飛天朱」朱幼麟，日前去咗新疆喀納斯參加滑翔傘比賽，佢喺比賽期間將部攝錄機裝喺滑翔傘上面，除見證自己飛天外，仲沿途影低唔少靚風景，事後仲將條片放上YouTube。
飛天朱今次係應國內一個叫藍色氣流滑翔傘俱樂部嘅組織邀請參加比賽，全國一共有三十幾人參加，而香港代表則有三個，飛天朱係其中之一。佢話今次比賽雖然冇得獎，但就認真難忘，因為嗰度嘅風景真係靚到你唔信，不愧有人間淨土嘅美譽。飛天朱今次去咗四日，頭三日因為氣流問題唔可以比賽，所以佢就去參觀一個國家原始森林。
幸好天公作美，最後一日氣流穩定，佢哋終於可以比賽。飛天朱特別提到喀納斯地處海拔二千幾米，所以空氣非常稀薄，完成賽事已好滿意，加上可以喺天空欣賞咁靚嘅風景，實在係不枉此行。