白鴿黨、富貴黨同工聯會早已公開表態，以舊有區議會功能界別只要「與區議會有緊密聯繫」嘅人都可參選為由，要求政府擴闊二○一二年立法會區議會功能界別五個「超級議席」參選資格。理由好簡單，事關三黨都有大佬級人物係前任區議員，一旦訴求如願，就可省免明年參選區議會一關，直接喺一二年競逐立法會超級議席，慳錢慳力，何樂而不為！
政府憂法律上受挑戰
之不過，政府憂慮一旦對參選資格鬆綁，法律上可能遭受挑戰，指有份投票嘅選民都有資格參選，會衝擊功能界別嘅定義，所以到依家都係緊箍不放。
有建制派人士話，白鴿黨打算提出要求擴闊超級議席參選人資格嘅修訂，多數都係煲冇米粥，一嚟議員議案要經過分組點票，如果中環吹雞，經濟動力同專業會議等固然歸隊攔截修訂，根本過唔到關；二嚟工聯會四票到最後係咪撐白鴿黨都好成問題。
該名建制派人士仲話九龍東地區消息傳出，工聯會嫻姐最近已開始就明年參選區議會作賽前熱身，部署喺九龍東再戰區選，雖然佢離開立法會兩年，但鋒芒猶在，以佢嘅實力，要贏一個區議會議席，幾乎穩坐釣魚船，使乜靠逼政府讓步咁麻煩？而且，工聯會根正苗紅，對政改呢類課題，就算要提修訂，都會自己操刀，點會甘做白鴿黨「背後嘅男人」，同政治對手站喺同一陣線？所以，工聯會話考慮撐白鴿黨，可以話係得體啲嘅門面說話而已。換言之，即係扮撐白鴿黨啦！
修訂難過關得個做字
不過，工聯會內部消息透露，會方的確希望政府能放寬超級議席參選資格，但唔係為嫻姐，而係畀白鴿黨大佬可以直接參選超級議席，唔使參加明年區選，炒熱選情，但承認唔代表會支持白鴿黨嘅修訂；而且，佢哋自知若然北京唔同意，就算提修訂都一定過唔到分組點票下功能界別一關，即係得個做字。