官僚文化有幾醜陋？睇睇以下兩個例子就知。一位廿幾歲女仔身體不適，由媽媽帶去醫院求診，途經北區大會堂時，病情突然惡化，媽媽情急之下衝入附近嘅北區民政事務處辦公室，要求職員代為報警，點知職員一口拒絕，連借電話都唔肯。經過一番擾攘，女仔暈低喺北區大會堂廁所內。

另一單畸士發生於日前，一位四十六歲救生員踩單車路經科學園對開嘅海濱長廊，忽然心臟病發，不省人事，兩名途經嘅漁護署捉狗隊人員見到後居然無動於衷，淨係要求附近嘅小食亭檔主報警，就咁走咗去。後嚟檔主轉告康文署嘅公園職員，職員再轉告主管，主管嚟到先至報警，前後拖咗二十分鐘，病人最終因為延誤救治而死。

孟子話，惻隱之心，人皆有之。但凡見到有人遭遇危險，應該即刻出手相救，呢啲係人類嘅本能反應，係人人皆有嘅惻隱之心。香港公僕見到市民急病求助，居然可以無動於衷，連打個電話報警都唔肯，試問人性何在？

其實，上述例子只係冰山一角嘅咋，近年公立醫院見死不救有之，康文署公園外判保安員眼白白睇住市民浸死亦有之，唔通香港人特別冷漠？當然唔係啦，香港人一向愛心爆棚，為善從來不甘後人。呢，早前有一名女嬰患上罕見病症，生命危在旦夕，本報登高一呼，應者雲集，善款由四方八面湧埋嚟，女嬰終於逃過鬼門關，獲得重生。

一邊係愛心爆棚嘅市民，一邊係冷漠無情嘅公僕，從呢個對比中，大家可以睇到乜嘢呢？睇到政府嘅官僚制度，就好似柏楊口中嘅「醬缸」咁，令公僕變得冷漠無情。正如有人指出，面對急病發作嘅救生員，漁護署同康文署職員都唔願上身，你推我讓，冇啲承擔，公務員抱住「多一事不如少一事」嘅心態，永遠只做自己「分內事」，久而久之，變得麻木不仁，連救人嘅本能意識都忘記咗，連做人嘅基本道義都放棄埋。

係呢，一個人連基本人性都失去，連基本道義都放棄，咁同其他動物有乜分別？叮！