菱電發展有限公主席胡曉明（Herman），係曾經有「電梯大王」美譽嘅胡法光之子，近年Herman活躍中港政商同體育界，今年更出任香港專業及資深行政人員協會會長。家族冇做電梯生意之後，轉型做地產、時裝、體育用品同酒店，Herman更好鍾意發掘美食，最愛幫襯集團旗下食肆，但佢次次幫襯都係「錢照畀，數目要均真」。
Herman○七年起入股好友周驪莉（Anna）旗下飲食集團「景樂」（King Parrot Group）做董事。景樂擁有三十六間食肆，由新疆、俄羅斯、泰國以至日本菜都有，較為人熟悉嘅包括香辣屋、西班牙餐廳El Cid、德國餐廳King Ludwig Beerhall等。
呢日Herman就相約太太梁子慧、大股東Anna同周氏家族另一位成員兼集團市場及業務發展部總監周基業（Keith）去灣仔合和中心地下嘅King Ludwig食德國菜。一坐低，佢就柯打一味脆皮燒豬肘配酸椰菜，胡太對海鮮有敏感，就叫一碟德國腸拼盤。呢啲豬肘係Herman同Anna用心鑽研，用黑椒、啤酒醃豬肘，風乾後將佢放入燒爐烤四十分鐘，外皮卜卜脆如廣東式燒豬，肉質仍然Juicy，嫩滑如雞肉，難怪日賣近一百六十隻。