影星州長阿諾舒華辛力加（阿諾）尋日現身中國杭州，此行唔係講政治，而係擔任上市公司阿里巴巴喺杭州舉行嘅「網商節」，任演講嘉賓，咁啱阿里巴巴主席馬雲前日（十號）生日，阿諾向馬雲送上一份遲來嘅生日禮物，就係佢喺《未來戰士》內嘅造型皮褸同型仔太陽眼鏡。馬雲即場穿戴呢套禮物，縮水版嘅新「未來戰士」惹得阿諾同一眾來賓哈哈笑。
金融海嘯後，加州經濟好差，阿里巴巴早前公布將喺加州創造十萬個職位，並開辦一個以阿諾舒華辛力加為名嘅新世代企業家培育計劃，為當地大學生提供網上商業培訓，阿諾梗要投桃報李，專登飛杭州都冇計。尋日答問環節精彩萬分，身形瘦小嘅馬雲向身材魁梧嘅阿諾請教點樣可以操fit啲，阿諾好幽默咁話，曾經寫過一本教人鍛煉健美體態嘅書，希望放上馬雲個網站上拍賣喎！
對於最近巴菲特等超級富豪提議死後捐出所有身家，培養子女自力更生嘅能力，馬雲就唱反調，批評話身家唔留畀子女，係不負責任行為。