- 2010年09月12日(日)
暑假完畢,好多人都叉足電返嚟,鄉議局主席劉皇發同蔣麗芸(Ann)今年合力籌組東歐豪華團,十二日行程後,人人盡興而返。佢哋遊覽捷克布拉格期間,適逢阿Ann嘅工業家父親蔣震八十七歲生日,阿Ann同媽咪、丈夫梁海明柯打一個方形大蛋糕為蔣老賀壽,團友就夾份送上一幅布拉格嘅風景油畫,令蔣老笑逐顏開。
呢個團有發叔、發嫂、發叔女兒劉玉蓮同夫婿余漢坤,再加上阿Ann夫婦、蔣震夫婦同朋友等一行二十二人,先啟程遊覽捷克布拉格古城同Karlovy Vary溫泉區,然後再乘搭多瑙河遊船暢遊德國、奧地利、斯洛伐克同匈牙利,沿途風景如畫。據聞期間發生一件趣事,有團友帶部iPad去甲板同蔣震及發叔捉中國象棋,引嚟大批外國人圍觀。
| ||||||||||||||||