人質慘劇發生後，政府高官一度取消晒外訪同公開活動，攞咗假嘅官都要銷假。事隔約三個禮拜，官場警報似乎解除咗，司局長又開始頻頻離岸，食物及衞生局局長周一鑊、保安局局長李少光同民政事務局局長曾德成，都會喺呢個禮拜外訪或放假，加埋公務員事務局局長俞宗怡（D姐）帶咗十五個常任秘書長去京滬，即係四局十五常秘同時離岸。咁多高官可以一齊撇，一係政府內部缺乏協調，一係就官場冗員太多，你話邊樣似啲呢？
常秘跟D姐遊學
官場警報喺慘劇發生第一個禮拜好嚴厲，第二個禮拜略有放鬆，不過當時立法會連續開兩個特別會議，啲高官亦唔敢行開，只有鬍鬚曾訪台，跟住又同財經事務及庫務局局長陳家強、金管局總裁陳德霖上北京。副局政助稍後又柴娃娃去上海，已經引嚟一啲批評。
到第三個禮拜，官場戒備似乎鬆晒，政府憲報日前就透露，喺人質事件中一路放假嘅周一鑊嚟緊十五號會外訪；而一直領軍救援同應付立法會議員嘅光哥，亦由十六號開始放番四日，佢本來早喺上個月攞咗假，準備八月下旬放假，因為人質案而取消咗，依家梗係要補番啦；至於曾德成亦因公幹離岸。局長撇咗三分之一，十二個局嘅十五個常任秘書長又跟咗D姐去北京同上海「遊學」，下亞厘畢道忽然少咗四局十五常秘，真係前所未見嘅事。
副局要醒醒定定
雖然話九月中立法會未復會，但往年呢個時候準備施政報告已經忙到反枱啦，今年就大玩真空，官場嘅紀律真係要執執喇。嚟緊呢幾日，副局長如梁卓偉、許曉暉等又要死頂，事關局長離岸，常秘又去遊學，佢哋幾乎要一個人打理三個人嘅嘢，醒醒定定至好呀。