有法師表示，自從收購事件發生後，鹿湖生態環境備受破壞，樹木被斬、山水被截，治安亦變壞，佛寺被爆竊，晚上收到滋擾電話，有法師受壓而被迫變賣佛寺。以前是禪修勝地，如今變得烏煙瘴氣，咁搞法，即使自信平生有仙骨，心靈難安之下實在難以修成正果！

講來講去，都係政府執法不嚴，愛理不理，致使私營骨灰龕見縫插針，經營方式甚至涉及違反土地契約。政府一味說要好好規劃骨灰龕，仲下巴輕輕話「十八區都要有」。唉！如今其他區未有住，不過離島就有嘞，仲係環境唔錯嘅佛門聖地，難怪啲骨灰龕位咁值錢，價錢由數萬至數十萬元不等。

市民被私營骨灰龕搞到頭都大，皆因興建者拍晒心口話合法，可是，去信有關部門投訴或詢問，卻是唔清唔楚，究竟有冇違反地契，又係得個吉！

如何看待私營骨灰龕滋擾禪修勝地？曾國藩有「四耐」，或可供一眾法師參考：耐冷耐苦，耐勞耐閒。冷清時心放平，艱難時咬牙做，煩瑣事循序幹，被忽視尋機會。堅定踏實努力，不着急。只有這樣，才可以在被滋擾的禪修之地，不會心煩氣躁，亦不會佛都有火轟政府監管不力！