當局建議，十年後將香港嘅碳強度由○五年嘅水準減少五至六成，人均排放量會由六點二噸下降到三點六至四點五噸。呢個建議據講係配合中央政府嘅自主行動目標o架。

減少溫室氣體排放，改善空氣質素，當局講就講得幾好聽，但做唔做得到就要打個問號。有環保團體就直言唔收貨，佢哋話，香港早就達到發達國家嘅經濟水平，但係家陣居然與內地睇齊，以發展中國家嘅減排水準作掩飾，認真醜死怪！

講到具體措施，更加得啖笑。諮詢文件提出兩招，一招係十年後三成私家車、一成半巴士同貨車，改用電力或混合動力；另一招係將煤發電由五成四減至不足一成，另外四成用天然氣發電，五成用核電。

其實，港府早就話要淘汰舊款巴士，可惜雷聲大，雨點小。家陣全港只有百幾架歐盟四期以上巴士，仲要增加二千幾架先至可以應付需求，換一部車要三百幾萬，巴士公司肯唔肯攞咁大筆錢出嚟換車呢？

至於改變發電燃料呢一招，亦係問題多多。正如有環保團體話齋，政府一面倒引入核能，令香港成為亞洲使用最多核能嘅發達城市，喺市民承擔高風險嘅同時，又唔可以淘汰用煤發電，根本係「走捷徑」，缺乏長遠承擔。

話時話，早前深圳核電廠發生洩漏事故，已經搞到人心惶惶，依家港府話核能發電要大幅增加至五成喎，唔擔心就假。仲有呀，日後增加核能發電比例，每年要多支出一百五十億元，羊毛出在羊身上，到時咪又係由消費者埋單。

無論點講都好啦，環保係大勢所趨，改善空氣質素更加係港人嘅願望，冇人會反對。港府提出減排大計，就一定要坐言起行，千祈唔好再吹水唔抹嘴，吹完又無影無蹤，否則，藍天白雲只有愈叫愈走，叮！