廣東三大社團尋晚首次合辦十．一酒會，個活動喺會展舉行，到場嘉賓冠蓋雲集，廣東社團總會主席王國強話，合辦唔係為咗慳錢，慳極都係幾十萬啫，係因為三大社團好多負責人都頭戴三頂帽，合辦嘅話，佢哋就唔使跑三場。
尋晚嘅活動中，香港廣東社團總會首席榮譽會長陳瑞球同曾憲梓都有現身，中華總商會會長蔡冠深、名譽會長霍震寰亦有到，但酒會未開始就離開咗。
廣東社團總會副主席、協成行集團董事總經理方文雄（David），就喺酒會中同全國人大代表羅范椒芬密密斟。David透露，佢召集咗○三年開始有份上京參加國情班嘅三百名同學仔，成立新組織「香江聚賢」，佢親自揸旗做主席，預定下禮拜三舉行成立儀式，同時舉行十．一酒會。咁大件事，羅太話佢實會支持。