醫管局行政總裁蘇利民最快下月中就會離職，返澳洲祖家陪屋企人，尋日佢喺醫管局嘅內部刊物撰寫咗近千字文章，洋洋灑灑大講佢對醫管局同本港醫療狀況嘅期望。十七個期望唔少都係「得把口」，甚至互相矛盾，譬如佢期望醫生有合理工時，即係縮短工時啦，但同時又期望病人輪候睇症嘅時間都縮短。佢諗頭多多，好似向林村許願樹亂拋寶牒咁，只係有幾多可以落實呢？
嫌護士制服太老土
臨別在即，蘇利民最近喺啱啱出版嘅醫管局官方刊物《協力》撰文，話自己返澳洲嘅決定得到好多支持：「香港人一向以事業為重，這次大家贊同我應該放家庭在首位，令我感到很驚訝。」
跟住佢大講自己嘅期望，除咗對醫管局未來發展有好多宏願外，仲期望醫生工時合理，護士工作量合理，最令人摸不着頭腦嘅係，佢期望護士們能夠穿上更具時代感嘅服裝，唔通佢覺得依家護士嘅制服太老土，所以希望睇到護士着得潮啲？佢咁講，唔通暗示醫管局已經研究緊全港護士換制服？又或者畀一個工作貼士繼任人？
肥胡強調係好朋友
佢又話，自己喺醫管局工作咗五年，會珍惜呢啲回憶。講到醫管局轄下公立醫院涉及好多事故，佢話自己期望喺一系列新推行嘅降低風險計劃後，醫療事故可以減少，而醫護人員亦可以從錯誤中學習。
外界盛傳蘇利民因為同醫管局主席胡定旭不和而劈炮，肥胡都喺同一份刊物中強調，佢同蘇利民不但合拍，仲係好好嘅朋友添，但一個人嘅去留，唔會影響醫管局嘅大方向。