話說國家主席胡錦濤日前喺出席深圳特區成立三十周年慶典前，單獨會見香港富商李嘉誠，肯定李先生對深圳改革開放同香港繁榮穩定所作嘅貢獻。作為香港首富以及舉世公認嘅成功商人，李先生得到國家領導人接見，本來係好正常嘅事，點知爛果報憎人富貴厭人貧，居然喺頭版以大字標題話「李嘉誠惡晒」，仲話中央咁做係「肯定李嘉誠在港的經濟霸權」，「令香港仇商情緒惡化」。

叮！爛果報扮晒憂港憂民，收皮罷喇！香港過去從來冇仇商呢回事，近年之所以搞到烏煙瘴氣，亂七八糟，正正係壹淫媒妖言惑眾、煽風點火所致，所以話，惡晒嘅唔係李先生，而係淫賤黎，佢唔止惡晒，仲臭晒添！

係人都知，淫賤黎之所以長期惡意針對李先生，係因為李先生不屑與呢種自認契弟嘅卑鄙小人為伍，拒絕喺誨淫誨盜嘅壹淫媒落廣告。淫賤黎吃不到葡萄就話葡萄係酸嘅，於是係又吠唔係又吠，一時唱衰人哋嘅樓盤臭氣熏天，一時又趁人哋拜山時搵個傻婆去大吵大鬧，生安白造，無所不用其極。淫賤黎以為咁做就可以逼到人哋落廣告，真係諗壞個腦，發夢都冇咁早。係呢，淫賤黎咁鍾意針對李先生，點解李家較早前增添兩個男孫，而且仲係一胞雙胎，佢又唔話人哋惡晒呢？

查實，除咗李嘉誠旗下公司拒絕喺壹淫媒落廣告，香港仲有好多大企業同樣杯葛壹淫媒，證明淫賤黎已成為過街老鼠，人人避之則吉，試問佢又可以唱衰幾多人吖？

話淫賤黎係過街老鼠，一啲都冇誇張㗎。嗱，台灣國家通訊傳播委員會（NCC）日前正式否決壹淫媒開設三條電視頻道嘅申請，包括新聞台、娛樂台及資訊綜合台，壹淫媒四度闖關，四度失敗，呢啲咪叫做多行不義必自斃咯。台灣當局質疑壹淫媒新聞節目以動畫表達，不符合真實呈現嘅專業要求，而且一味宣揚腥色羶，對兒童嘅保護措施不足。一句講晒，壹淫媒敗壞社會風氣，違反道德倫理，台灣當局嚴格把關，係理所當然，大快人心。

淫賤黎仲死撐，話台灣當局箝制言論自由及創意喎。叮，壹淫媒誨淫誨盜，四圍播毒，呢啲關言論自由及創意乜嘢事呢？唔通宣揚色情暴力甚至孌童，就叫做言論自由及創意吖？真係九唔搭八！

講開又講，台灣當局儆惡懲淫，與香港政府百擒百縱，簡直不可相提並論。壹淫媒喺香港違反《淫褻及不雅物品管制條例》百幾次，次次都獲司法機構輕輕放過，罰款不過一萬幾千，如果話冇人包庇，細路仔都唔信喇。除咗宣淫販賤，壹淫媒仲有一樣那渣招，就係不問自取，長期侵犯東方報業集團版權，遠嘅唔講，近年被捉到正嘅就有三十九次。「東方做，蘋果盜」，對於呢啲明目張膽嘅侵權行為，口口聲聲保護知識產權嘅港府居然詐傻扮懵，你話奇唔奇！

所以話淫賤黎惡晒兼臭晒，真係冇講錯。不過咁，太一叮始終相信善有善報，惡有惡報，淫賤黎依家惡晒，唔表示永遠惡晒，時候一到，一切都報。叮！