一反傳統

這名貪玩的大男孩，原來一早已成家立室，育有一子一女。要望子成龍或望女成鳳，理應由小時候開始，但鄭雨滇卻一反傳統，任由子女自由發展，「我唔會逼佢哋學咩玩咩，佢哋鍾意做就做。」原來與他從父母處學來的一套哲學有關，「我以前唔想再讀書要做騎師，父母當時無反對，任由我做鍾意做嘅嘢，所以我想啲仔女都應該係咁。」

最討厭強迫學習

鄭雨滇的成長哲學要回到十多年前，他中五畢業時，馬會招聘騎師，他自小喜愛看賽馬直播，二話不說向父母表明心迹要做騎師，以為父母會以學業為重反對，豈料聽到的卻是鼓勵說話，鄭雨滇於是向夢想出發，自此馬會多了一顆明日之星。

自由發展令鄭雨滇有今日的成就，現時鄭雨滇已為人父，阿哥八歲，阿妹三歲，今時今日的社會，父母為子女着想都鋪排後路，強迫子女學習，但鄭雨滇最討厭這種教育方法，「應該係讀到就讀，最緊要係佢哋開心，任佢哋自由發展啦！」當然，也有未如人意時，「買咗個琴，點知個女彈咗一排就唔彈！不過，畀唔同機會佢去嘗試，至知佢鍾意啲咩。」