鄭雨滇一出世就遇正下雨天，父親索性用雨字作為他名字，至於滇字何來，鄭雨滇也不清楚，他說：「我只係知道『滇』係解做雲南，至於我老竇同雲南有乜淵源，咁我真係答唔到你。」見他答得咁「騎呢」，記者打趣問他，生在雨天，雨中策騎會不會特別好呢？他卻突然一本正經起來說：「騎馬騎得好係講人同馬嘅發揮，落雨同好天都唔影響我比賽。」
手機及衣着要夠綠
以為他不迷信，但事實又相反。鄭雨滇接受訪問當日身穿綠色T恤，手上最新款的iPhone4手機保護套又是綠色，「風水師話綠色旺我。」既然如此，比賽時他身穿的綵衣點解又是五顏六色？「馬會對綵衣有規定，騎師唔可以揀，晨操時騎師有話事權，所以我晨操時嘅綵帽以綠色為主。」然而，將自己命運交託給風水師，似乎並不科學，但他卻認為這是心理學，「聽咗師傅講，我都會跟佢做，起碼心理上會覺得好啲。」
是風水師靈驗嗎？鄭雨滇九八年出道後愈戰愈出色，比前冠軍騎師告東尼「巴閉」，短短兩年就當上職業騎師。至今則贏逾三百零七場頭馬，總獎金逾三千五百萬元。
愛遊大阪玩彈珠機
綠茵場上全力拚搏，放下馬鞭，鄭雨滇就自有一套解壓之道，他說：「玩，就可以化解壓力。」每逢抖暑，第一件事是去旅行，歐洲途程太遠並非他那杯茶，韓國食物又辣又凍亦不合他口味，只有日本是他最愛，首選卻是較冷門的大阪，因為大阪有彈珠機玩。「我試過玩十幾個鐘，但唔係為咗贏錢，只係享受玩個過程。彈珠機純粹運氣，唔使靠技術，但睇住啲波子係咁出嚟我覺得好好玩。」
玩了十多年，何時才停下來？鄭雨滇相信他的騎師生涯，還會「玩」十多年，完結後或轉行做練馬師，也要做馬主，雖然那是很久以後的事，但鄭雨滇一臉認真地說：「養隻馬玩吓，唔計較成績，睇吓佢比賽已經好滿足。」
鄭雨滇小檔案
年齡：29歲
家庭狀況：已婚，育有一子一女
出道年資：12年
個人榮譽：
冠軍見習騎師（99/00、00/01）、
騎師龍虎榜第五位（09/10）、
代表香港傳送北京奧運聖火