政府尋日鐵腕清拆紫田村，護村村民極力頑抗，身兼屯門區議員嘅白鴿黨女將陳樹英都在場，但並冇發揮調解作用，反而係官民對峙、撐到行，直至身兼行政會議成員，有「新界王」之稱嘅鄉議局主席劉皇發突然出手先至有轉機。
發叔當場打通運輸及房屋局局長Eva鄭汝樺嘅專線，喺電話傾幾句就幫村民爭取到延遲兩個星期拆村，當時喺發叔身後嘅陳樹英仲振臂高呼「好嘢」。吓！佢當正自己有功，有份為村民搞掂單嘢咁。無他嘅，明眼人都睇得出，佢都係想搶分啫！
陳樹英喺政壇浮沉多年，一直喺新西打滾，幫白鴿黨主席「鐵頭仁」何俊仁睇住檔口，想再上層樓進身立法會，似乎都好似其他第二梯隊咁望天打卦，但近期白鴿黨內部流傳，政改方案通過，一二年鐵頭仁好有可能由新西轉戰區議會功能組別超級議席，陳樹英有機會起而代之，拍住老公「高達」李永達以兩支旗形式「夫妻檔」參選。
可能因為咁，陳樹英睇準新西近期發生紫田村呢類民生風波催谷人氣，但以佢嘅「功力」同發叔真係差天共地喇，而喺尋日嘅紫田村收地風波當中，陳樹英嘅表現好明顯係乘機掹發叔衫尾邀功，博攞到分等佢有機會同老公高達一齊出選一二年立法會選舉。