尋日係暑假後首個行政會議午餐，有「頭箍小姐」之稱嘅財經事務及庫務局常秘區璟智都係座上客之一，見佢皮膚曬黑咗，原來去完敦煌玩。敦煌有個名列世界文化遺產嘅莫高窟，頭箍小姐入到寶山就由朝睇到晚，連汁都撈埋，仲驚嘆唐代婦女思想開放，着低胸透視裝原來好普遍。
有乜得着？佢話借鑑敦煌興衰有助香港發展，事關當年敦煌係中原通往西域嘅唯一通道，中西文化薈萃，有助激起新思維，可惜當海上絲綢之路興起，敦煌盛世就走下坡。反觀香港，亦係中西文化交匯點，要保持強勢就唔可以自滿，要不斷走在前面先得喎！
有份出席午宴嘅仲有婦女事務委員會主席Sophia高靜芝，佢喺暑期都有出門充電，去美國洛杉磯探望年屆九十歲嘅媽媽。Sophia嘅兄弟姐妹都喺嗰邊發展，今次難得一家團圓，佢仲親自下廚，煎牛扒畀媽咪食添！