喺菲律賓人質事件中「彈出」嘅保安局副局長黎棟國，處理手法大獲好評，但黎Sir尋日喺大氣電波話真係冇人想發生呢啲事，佢做事都係攞個心出嚟，冇諗過要提升民望。
對於香港阿Sir因帶彈殼出境，一度被菲律賓警方「扣查」，黎Sir話仲未有時間安慰嗰位阿Sir，但就大讚香港公務員EQ高，即使有阻滯，亦會理解，最緊要都係嗰句，就係「本住個心，辦好件事」；仲話政府喺今次事件獲得市民支持，對佢哋都係一種鼓勵。
再問到香港同菲律賓喺處理人質事件同查案嘅手法時，黎Sir就話香港人有香港人嘅做事方式，對方亦有對方嘅文化，好似橙同蘋果咁，兩者冇得比較。
佢啱啱同一眾副局政助訪問上海返港，憶述九四年都去過浦東，當時嗰度只係一片爛地，估唔到十六年後嘅今日，浦東高速發展。佢又盛讚洋山港規模龐大，值得去睇睇咁話。