徐英偉自拍o靚模上身

被嘲為「八國聯軍」嘅副局長同政治助理，知名度低到貼地不在話下，社會各界都覺得佢哋咁高人工但又冇貢獻，炒聲四起。早前佢哋獲邀組團訪問上海，本來係自我宣傳、谷吓人氣嘅好機會，但新聞處唔知搞乜，遲咗兼喺深夜發相，變相令佢哋嘅訪滬行程變咗明日黃花，隔夜新聞冇人報。事隔幾日，有啲副局政助忽然瞓醒，知道求人不如求己，竟然識得轉膊自救！

副局政助訪滬鴨仔團結束行程，尋日上佢哋嘅facebook吓，即刻見到環境局副局長潘潔、商務及經濟發展局副局長蘇錦樑、民政事務局政治助理徐英偉，同埋早兩日提前離隊、返港為愛女去聖保羅男女中學聽入學講座嘅民政事務局副局長許曉暉，都放咗訪滬嘅相上嚟。

睇嚟上facebook會友已成為大家返港後嘅頭號工作。大家上載嘅相各自各精彩，共通點就係大家上載嘅相都非常有個人主義，各自喺相中搶佔有利位置，徐英偉更係G模上身，成個相簿都充滿佢啲少男自拍，唔知係咪想俘虜班「80後」嘅芳心呢？

冇圖片說明變猜啞謎

可能佢哋知道要上位要靠自己，但仲做得衰過新聞處喎。點解？新聞處之前發嘅相都係得幾句圖片說明，起碼有提及佢哋喺上海見過乜嘢人或參觀過乜嘢地方，但呢班副局政助喺facebook仲「簡潔」，只係喺啲相旁邊輕輕咁加句「到上海訪問四天」，連佢哋嘅行程細節、得着同香港可以借鏡嘅地方等都一概不知。

唉！未到中秋就要猜啞謎，呢班副局政助真係「先知先覺」囉！其實，如果佢哋真係想用互聯網同市民溝通，就唔好以為就咁貼幾張相上網就交咗差。大家睇完呢啲相，只係會以為佢哋嘥公帑遊上海啫！