呢，有環保組織發起「香港無冷氣夜」，呼籲市民本月二十九日晚至翌日朝早停開冷氣，本港八間大學、多個政黨同私人機構承諾支持，主辦機構希望達到減少過千噸二氧化碳排放嘅目標。

個個盡綿力，齊齊救地球。無冷氣夜目標完全冇錯，無疑可以引起全港市民對氣候變化嘅關注。不過短短半日，減排效果始終有限。如果當局唔大刀闊斧做啲嘢，香港只會愈來愈烏煙瘴氣。

叮！弊在港府減排得把口，拖得愈耐愈啱，標準愈低愈正。嗱，莫講話實事唔做，連出份報告都慢過人。好似氣候變化研究顧問報告咁，原本話舊年年底前搞掂，結果拖吓拖吓，家陣仲係泥牛入海，冇晒音訊。又譬如，港府一味向低睇齊，聯合國有更進取嘅減排目標唔去跟，只跟內地嘅減排目標，變咗不減反加。

講到做具體嘢，港府更加係靠害！有環保組織成員尋日踩上中環，要求當局盡快要「毒氣巴士」退役。唔講唔知，原來本港繁忙路段嘅空氣污染物，四成來自專利巴士所排嘅廢氣，當中有四成由歐盟二期巴士排出。

叮！全港目前仲有二千六百架歐二巴士，港府居然容許「殺手」到二○一九年至全部退役。環保組織計過條數，假如呢啲車提早喺二○一五年前全退，整體空氣污染物可減少一成六至二成三，而環境局局長邱騰華罔顧民意推出嘅停車熄匙，只能令空氣污染物減少約百分之一。

另一條數更得人驚。環保組織話，歐二巴士每年排放九百二十噸氮氧化物同四十噸可吸入懸浮粒子，容許呢類巴士遲四年退役，期間本港患呼吸病求診個案將增加二十萬宗。唔分輕重，該做唔去做，當局減排誠意有幾大，心照啦！

話時話，港府搞環保幾時都係做騷咁做，取易不取難。最初整色整水叫班公僕玩「便服日」，完全得啖笑；跟手阿茂整餅推停車熄匙，更係擾民；之後高官東施效顰喺「無車日」齊齊表演，直頭就係核突。

舊年本港首次響應國際無車日，高官做騷不甘後人，行路、搭港鐵、逼巴士、坐纜車，各適其適，個個面露笑容扮晒嘢。講真，一年一騷，其餘三百六十四日，高官都係專車出入，無車日似「無聊日」多啲。

便服日着一日便服，無車日行一次路，無冷氣夜開一晚風扇，做完騷一切照舊。計太一叮話齋，靠呢班高官減排，綠色生活得個吉，地球死快啲就真。叮！