政壇有一種說法，話民主派同建制派各有鐵票，呢個現象喺港島區尤為顯著，好似啱啱結束嘅薄扶林區補選，公文袋司馬文爆冷鍊贏匯賢智庫嘅劉應東，政圈再次祭出鐵票定律，話呢個係六四黃金定律，只要泛民大聯合一定可攞到六成選票，剩低四成係建制派。不過，白鴿黨主席何俊仁就話：「大家唔好迷信六四黃金定律！」
鐵頭仁話，今次兩名候選人都各有特質，加上拉票期間又發生咗啲事令選民反感，呼籲大家唔好輕信「六四黃金比」，言下之意，即係叫班泛民戰友唔好輕敵，要繼續努力。又係嘅，今次補選白鴿黨等泛民陣營冇派人出選，形成建制同泛民對決，冇人分票嘅情況唔一定喺出年嘅區議會選舉發生，鐵頭仁早啲拉警報，聽者自己解讀喇。