本港大學喺世界上嘅排名不斷改進，教職人員卻冇好似中小學教師咁，有政府有關部門頒發嘅卓越教學獎，尋日大學教育資助委員會（UGC）搞晚宴，宴請由八大院校內部選出嘅卓越教師，八大院校校長梗要畀面出席，近一百五十人聚首一堂，氣氛好熱鬧。教資會主席查史美倫（Laura）亦好識做，席上宣布一項令人雀躍嘅消息，就係UGC正籌備緊一個卓越教學獎，頒畀傑出大學教師。
大學教師一直冇全港性獎項，只能由八間院校各自頒畀自己嘅教職員。UGC今次設立新獎項，對大學教職人員都係一個鼓勵。Laura話，設立呢個獎項係想帶出一個強烈訊息，就係UGC將以卓越教師為榮，希望形成一個菁英教師嘅網絡，塑造一個卓越教學文化。
UGC已成立小組落實有關設想，負責遴選最合適人選，但暫時未有正式推出時間表。至於咩教師最有希望當選呢？Laura就話，教本科叻唔係最重要，反而要對教學文化有貢獻。